Բնակարանի տարբերությունը մեծ էր՝ առաջին անգամվանից, երբ ինձ
այնտեղ տարավ Ռադան և այդ օրվա, երբ կամավոր ինքս էի հյուր գնացել։ Այն բավականին լուսավոր
էր, արևկող ու մաքուր, հարմարավետ էր ամեն առումով՝ ի տարբերություն այն բնակարանի,
որտեղից ըստ կոսովոցու, մի քանի շաբաթ առաջ էր Դավիթը տեղափոխվել։
Վերջապես քույրը ծխախոտն անջատեց, ոտքի ելավ։
-
Առաջացեք,- ասաց
նա և մոտեցավ ձեռքով բարևեց,- Բարև ձեզ, անունս Լալա է, սուրճ կխմե՞ք։
-
Ուրախ եմ, բայց
սուրճի սիրահար չեմ, իսկ այսօր բացառություն կանեմ,- համեստացա ես,- Բայց շատ թույլ,-
պատասխանեցի, անդադար հազալով, քանի որ քույր ու եղբայր ծխում էին միաժամանակ։
-
Դե ինչ, ձեր նոր
տեղը հարմա՞ր է, Դավիթը պատմել է ձեր մասին,-
Հարցրեց Լալան, դեմքը խոժոռելով անցավ խոհանոց, քիչ հետո երեք բաժակ սուրճ դրեց
սեղանին։
-
Չէի բողոքի, եթե
այնտեղ օդ լիներ շնչելու, միշտ խեղդվում եմ, և ամեն երեկո թվում է՝ վերջին անգամ եմ
քնում, բայց հրաշագործ Աստծո ողորմածությամբ առավոտներն արթնանում եմ։ Հիմա ուզում
եմ այս ամենը պատմել բժշկին, բայց չեմ կարողանում, գուցե օգնե՞ս թարգմանելու հարցում,-
դիմեցի Դավիթին, իմանալով՝ նա չորս տարի է, ինչ ապրում է Գերմանիայում և ըստ իրեն՝
կարող եմ ամեն հարցով դիմել։
-
Խնդիր չկա, կգամ,
կթարգմանեմ,- հստակ խոստացավ հայրենակիցս, միաժամանակ վառելով հաջորդ ծխախոտը։
-
Երկա՞ր ես հյուրընկալելու
եղբորդ,- հարց տվեցի Լալաին, երբ նստեց սրճելու,
իսկ Դավիթը դուրս եկավ պատշգամբ։
-
Չգիտեմ, այ ցավդ
տանեմ, ոնց մնամ, այնքան շատ գործեր կան՝ խանութներ ունեմ, թողել եկել եմ։
-
Իսկ հիմա ո՞վ է
աշխատեցնում խանութները՝ խանութն այնպիսի բան է, որ չես կարող միանգամից փակել։
-
Մորաքույրս է, նա
էլ առանց ինձ չի կարողանում, այնքան կապված ենք իրար հետ։
-
Այդ դեպքում իսկապես
երկար մնալ չես կարող։
-
Ձեր գործերն ինչպե՞ս
են,- հետաքրքրվեց Լալան,- Հարցազրույց տվե՞լ եք։
-
Ո՛չ, սպասում եմ,
արդեն բավականին ժամանակ է։
-
Մենք վերջացրինք,
երեկ ես հարցազրույցի էի Թրիրում,- անսպասելի ասաց Լալան։
-
Հյուրերը նույնպե՞ս
հարցազրույց են տալիս,- զարմացա ես։
-
Ի՞նչ հյուր, այ
ցավդ տանեմ, եկել հանձնվել եմ, բայց սա իմ տեղը չէ,ետ կգնամ։
-
Շուտով տեղափոխվելու
եմ Քյոլն, այնտեղ տուն ունեմ,- պատշգամբից ներս մտնելով ասաց Դավիթը և խոսքի արժեքն
իմացողի պես թինկ տվեց բազմոցին։ Իհարկե հոգուս խորքում, բացի զարմանալուց նաև նախանձեցի
իմ ամենակարող հայրենակիցներին։
-
Իսկ ինչպե՞ս ես
կարողացել, ես մի թարգմանիչ գտնել չեմ կարողանում, իսկ դու մեծ քաղաքում տուն ունես, քրոջդ ես բերել։
-
Դե մի բան գիտենք
էլի, որ կարողանում ենք,- մի տեսակ հայական մունաթով պատասխանեց նա, որը նշանակում
էր՝ կասկածու՞մ ես։
-
Երկար ժամանակ է
տիկին Շուլցին չեմ տեսել, պետք է նաև սոցիալ մտնեմ, ասացի ոտքի կանգնելով։
-
Ի՞նչ սոցիալ, համարյա
սոցիալ չկա այստեղ,- ձեռքը թափահարեց Դավիթը։
-
Ինչպե՞ս թե չկա,
իսկ տիկին Շու՞լցը։
-
Սոցիալի շենքը վաճառել
են, իսկ սոցիալը տեղափոխվել է ուրիշ տեղ, երբ գնում ես Շուլցի մոտ, նա էլ ուղարկում
է գլխավորի մոտ՝ Վիտլիխ, այնպես որ նա կարևոր մարդ չէ։
-
Չգիտեի,- անակնկալի
եկած՝ ուսերս թոթովեցի ես։ Իհարկե նորությունը սրտովս էր, ուստի բացի հավատալուց նաև
դադարեցի հետաքրքրվել սոցիալի նոր իրավունքներով և տեղով։
Комментариев нет:
Отправить комментарий