Ադելը վաղ եկավ։ Բոված գարիով պատրաստած «սուրճ» խմեցինք։ Այնուհետև նա պատմեց առաջին հարկի  գորիսեցի ընտանիքի մասին, ասելով թե կնոջը՝ Արփենին ճանաչում է, որպես համագյուղացի և  ըստ կնոջ պատմածի Գորիսը արդեն ազատագրված է և էլ ավելին՝ թեժ մարտերից հետո, ազատագրվել է նաև «Կուբաթլուն»։ Կինը պատմել էր, որ այնտեղ բերք ու բարիքը անտեր թափված է փողոցներում, քանի որ  տերեը փախել են հայկական ջոկատների հարձակումներից։

Ինձ համար անսպասելի, նա առաջարկեց, որպեսզի գնանք Կուբաթլու միրգ ու բանջարեղեն բերենք։ Նաև զարմացա նրա առաջարկին, քանի որ այն պետք է որ շատ ծանր լիներ երկու կնոջ համար, առավել ևս պետք է մի քանի տրանսպորտ փոխեինք նախ այնտեղ հասնելու համար, իսկ հետո վերադառնալու։ Ինչևէ, նազ ու տուզ չարեցի՝ համաձայնվեցի։ Քանի որ ուտելիք չունեինք ճանփի հաց վերցնելու, ուստի վերցրեցինք երկու մեծ պարկ, ճամփա ընկանք  (ասեմ որ ճամփին մտքափոխվեցինք և որոշեցինք, հիմնականում նուռ հավաքել)։ 

Դռվարություններով հասանք Գորիս։ Ադելը վախենալով,ցանկացավ գաղտնի պահել հարազատներից մեր Գորիս գնալը։ Արփենը մեզ ընդունեց սառը, իսկ հաջորդ նախադասությունը եղավ․ 

- Ես ձեզ հետ կյամ չեմ,- ես շվարած, ավելի ճիշտ վախեցած նայեցի Ադելին, իսկ նա զայրացած վրա տվեց անյուրնկալ համագյուղացուն, թե էդ ո՞նց կլինի, այսքան ճամփա ենք կտրել եկել, նորից ձեռնունայն ետ գնա՞նք։

-  Հինչ անեմ,- ուսերը թոթովելով, անտարբեր պատասխանեց կինը, ապա ավելացրեց,- Հարևանը քինմա, ոզմեք, ասեմ, հետերը քյացեք,- նորից շվարած մենք իրար մտիկ արեցինք

 - Էդ հովա՞, ես ճնհանչըմ չե՞մ,- հետաքրքրվեց Ադելը։

- Խի՞ ճնհանչըմ չեժս՝ Աղվեսը- Կնոջ պատասխանից Ադելը գունատվեց, բայց ոչինչ չպատասխանեց, միայն գլխով արեց, քանի որ այլընտրանք չունեինք։

Ողջ օրը սև ամպերից անձրև էր թափվել «Գրադով» քարուքանդ եղած Շինուհայրի վրա։ Բակում, աղբյուրի տակ լվացինք մեր ցեխից ծանրացած կոշիկները, ներս մտանք՝ չորս երեխաները մութ ու անհյուրընկալ սենյակում, երկաթե հին մահճակալին շարվել էին, ժլատ կրակով բոցկլտացող վառարանի շուրջը, իսկ մյուս պատի տակ դրված հին բազմոցի մեջ մխրճված էր տանիքից ներս ընկած չտրաքած «Գրադը»; Օրը շուտ մթնեց՝ մութը գնալով թանձրացավ, վերածվեց անթափանց խավարի, Որով էլ մոռացվեց «Գրադի» ներկայությունը։

                                                                                                              շարունակելի